باڵیۆزی بەریتانیا لە ئیمارات رایگەیاند، گۆڕانکارییەکانی ئاو و هەوا کاریگەریان لەسەر عێراق دەبێت بە شێوەی گشتی و لە داهاتوودا دەبێتە وڵاتێکی بێ ئاو.
مارک ریچاردسۆن باڵیۆزی بەریتانیا لە ئیمارات رایگەیاند، “عێراق لە چەند ساڵی داهاتوودا دەبێتە یەکێک لەو دەوڵەتانەی بە رێژەیەکی زیاتر رووبەڕووی وشکەساڵی دەبێتەوە”.
ئاماژەی بەوەش کرد، “ئەگەر بێت و چارەسەرێک نەدۆزرێتەوە و هەنگاوی بەپەلە نەنرێت عێراق دەبێتە تینووترین دەوڵەتی جیهان، بۆیە پێویستە حکومەتەکەی محەمەد شیاع سودانی چارەسەری قەیرانی ئاو بکاتە ئەولەویاتی کاری کابینەی حکومەتەکەی”.
ئەمە لە کاتێکدایە لە ماوەی رابردوودا بە هەمان شێوە رێکخراوی نەتەوەیەکگرتووەکان هۆشداری لە کێشەی کەمئاوی لە عێراق دابوو، کە بەهۆی ئەو قەیرانەوە لە ساڵی 2021 رێژەی بەرهەمهێنانی دانەوێڵە بە رێژەی %25 کەمیکرد”.
