بافڵ جەلال تاڵەبانی لە پەیامێكدا بەبۆنەی ساڵیادی بونیادنانی سلێمانی رایدەگەیەنێت، سلێمانی لانکەیەکە بۆ لەدایکبوونی رۆحی نیشتمانپەروەری، سیمبوولی بەگژداچوونەوەی نادادییە و هەوێنێکە بۆ بیری ئازادیخوازی و دیموکراسی.
دەقی پەیامەكە:
سلێمانی بۆ ئێمە تەنیا شارێک نییە، بەڵکو لانکەیەکە بۆ لەدایکبوونی رۆحی نیشتمانپەروەری، سیمبوولی بەگژداچوونەوەی نادادییە و هەوێنێکە بۆ بیری ئازادیخوازی و دیموکراسی.
دەبێت هەمووان لەئاست ئەو راستییە مێژووییە ملکەچ بن کە هیچ رەشەبایەکی لەرزۆک ئەم شارە زیندووەی نەبەزاندووە. بەگژ هەموو ئەو بیرکردنەوانەشدا دەچێتەوە کە دەیانەوێت ئەو رۆحە زیندووە لەم شارە بزێوە بسەننەوە و بە عەقڵییەتی تۆڵەسەندنەوە و سیاسەتی ناتەندروستەوە گەمارۆی بدەن.
سلێمانی خوێنە و بە دەمارەکانماندا دەگەڕێت، سلێمانی رۆحمانە و دەیپارێزین، سازشی لەسەر ناکەین و هیچ هەڵەیەکیش بەرامبەری قبووڵ ناکەین.
پیرۆز و شكۆداربێت ساڵیادی دامەزراندنی شاری سلێمانی
بافڵ جەلال تاڵەبانی
سەرۆکی یەکێتیی نیشتمانیی کوردستان
14ی تشرینی دووەمی 2022
