وەزارەتی ناوخۆی تورکیا ئاشکرایکرد، تۆمەتباری تەقینەوەکەی ئیستانبولیان دەستگیرکردووە کە بووە هۆی مردنی شەش کەس و برینداربوونی زیاتر لە 80 کەسی دیکە.
بەرەبەیانی ئەمڕۆ دووشەممە سولەیمان سۆیلۆ وەزیری ناوخۆی تورکیا ڕایگەیاند، ئەو کەسەی بۆمبەکەی شەقامی تەقسیمی لە ئیستانبول داناوە دەستگیرکراوە، پارتی کرێکارانی کوردستانیشی بەوە تۆمەتبارکرد کە لە پشت ئەنجامدانی ئەو تەقینەوەیەوەن.
ئاژانسی ئەنادۆڵوی فەرمیی تورکیا لە زاری وەزیری دادی ئەو وڵاتەوە بڵاویکردەوە، “بەر تەقینەوەکە ژنێک بۆ ماوەی 40 خولەک لە نزیک شوێنی بۆمبەکە دانیشتووە، دواتر بە ماوەیەکی کەم پێشئەوەی بتەقێتەوە ڕایکردووە و شوێنەکەی جێهێشتووە”.
ئاماژەی بەوەکردووە، بۆمبەکە لەو شوێنەدا دانراوە و لە دوورەوە تەقێنراوەتەوە و کردەی خۆکوژی نەبووە.
شەوی ڕابردوو لە شەقامی تەقسیمی ئیستانبول تەقینەوەیەک ڕوویدا، بەپێی ئامارە فەرمییەکانی ئەو وڵاتە شەش کەس کوژراون و زیاتر لە 80 کەسی دیکەش بەوهۆیەوە برینداربوون، تا ئێستاش هیچ لایەنێک بەرپرسیارێتیی خۆی لە تەقینەوەکە ڕانەگەیاندووە.
