لە دوای تێپەڕبوونی پێنج ساڵ، حکومەت قەرەبووی زیانلێکەوتووانی بومەلەرزەکەی دەربەندیخانی نەکردووەتەوە

ئەمڕۆ پێنج ساڵ بەسەر ئەو بومەلەرزەیەدا تێدەپەڕێت کە سنووری قەزای دەربەندیخانی گرتەوە و بە هۆیەوە زیانێکی زۆری ماددی لێکەوتەوە، قائیمقامی شارەکەش دەڵێت تا ئێستا حکومەت قەرەبووی هاوڵاتییانی زیانلێکەوتووی نەکردووەتەوە.

سڵێمان محەمەد قائیمقامی دەربەندیخان بە تۆڕی میدیایی ئێستای راگەیاند، “ئەمڕۆ پێنج ساڵ بەسەر ئەو بوومەلەرزەیەدا تێدەپەڕێت کە لە قەزای دەربەندیخان روویدا و بە هۆیەوە زیانێکی زۆری ماددی لێکەوتەوە، بەڵام بەداخەوە تا ئێستا حکومەت یەک دینار قەرەبووی زیانلێکەوتووانی نەکردووەتەوە”.

ئاماژەی بەوەش کرد، “زۆرێک لەو بینا حکومیانەی کە زیانیان بەرکەوت تا ئێستا وەک خۆیان ماونەتەوە، دیارترینیشیان هۆڵی نەشتەرگەری نەخۆشخانەی دەربەندیخانە، لەگەڵ پێداویستیی شارەکە بەو هۆڵی نەشتەرگەرییە، بەڵام بەجێهێڵراوە و نۆژەننەکراوەتەوە”.

ئاشکراشی کرد، “لەدوای رووداوەکە بە هەوڵی خێرخوازان بڕی 400 ملیۆن دینار و بڕێکی باش مەوادی بیناسازی بەسەر زیانلێکەوتووانی بومەلەرزەکەدا دابەشکرا، ئەوەش حکومەت پێی هەڵنەستا تەنها هەوڵێکی خێرخوازی بوو”.

شەوی 12ی تشرینی دووەمی 2017، بومەلەرزەیەک بە گوڕی 7.3 هەرێمی کوردستانی هەژاند کە زۆرینەی زیانەکانی لە سنووری قەزای دەربەندیخان بوون کە بە هۆیەوە پێنج کەس گیانیان لەدەستدا و 20 کەسی دیکەش برینداربوون و زیاتر لە هەزار و 500 خانووی هاوڵاتییان زیانی بەرکەوت، جگە لەوەش ژمارەیەکی زۆر لە دامودەزگا حکومییەکان زیانیان بەرکەوت و بەنداوی دەربەندیخانیش یەکێک بوو لە دیارترینیان.

سامان ئیسماعیل بەڕێوەبەری بەنداوی دەربەندیخان لە بارەی نۆژەنکردنەوەی بەنداوەکە و بوونی مەترسی لەسەری بە تۆڕی میدیایی ئێستای وت، “ئەو کاتەی بوومەلەرزەکە روویدا لە راستیدا زیانی لێکەوەتەوە، درزی لە زەوییەکەدا دروستکرد، بەڵام دواتر کە چاودێریمان کرد زانیمان کە درزەکان زیادیان نەکردووە، بە چەند قۆناغێکیش دەستمان بە نۆژەنکردنەوەی کرد”.

باسی لەوەش کرد، ” ئەو درزەی کەوتبووە نێوان بەشە کۆنکرێتییەکە و خۆڵەکەی چارەسەر بکەین، دواتر دیسان کۆنکرێتمان کردەوە، ئێستاش دەستمان بە قۆناغێکی دیکەی نۆژەنکردنەوە کردووە، کارکردن تێدا بەردەوامە کە بڕی دوو ملیار و 300 ملیۆن دیناری لە لایەن حکومەتەوە بۆ تەرخانکراوە، دەتوانم بڵێم هەتا قۆناغی ساڕێژبوونیش بەنداوەکە هیچ مەترسییەکی لەسەر نییە”.

وتیشی، “ئێمە دەزانین سێ ساڵە وشکەساڵی هەیە بەراورد بەو چەند ساڵەی رابردوو ئاستی ئاوی بەنداوەکە دابەزیوە، بەڵام لەگەڵ ئەوەشدا هێشتا 40 سانتیمەتری لە ئاستی ساڵی رابردوو زیاترە، ئەمە نەک لەبەرئەوەی باران زۆرتر باریوە، بەڵکو بەهۆی ئەوەوەیە کە دەستمان بە ئاوەوە گرتووە”.

 

بابەتی پێشتر

وەزارەتی كشتوكاڵ هەڵمەتی چاندنی یەك ملیۆن نەمام رادەگەیەنێت

بابەتی دواتر

لە هەرێمی کوردستان بازرگانیی بە مرۆڤ زیاتر بە گەورەکانەوە دەکرێت

بابەتی پەیوەندیدار
زیاتر ببینە

هەڵوێستی توركمانەكان و هۆشدارییەكانی پەكەكە.. ڕوونكەرەوەی هێڵە نیشتمانی و نەتەوەییەكان و نمایندەی دەنگدەری كوردستانی

دوو هەڵوێستی جیاواز لە توركیا و پەكەكەوە، لەبارەی پشتگیریكردن لە حزب و لایەنەكانی باشووری كوردستان بۆ هەڵبژاردنی پەرلەمانی…
Total
0
Share