بەڕێوەبەری پەروەردەی ڕۆژهەڵات لە سلێمانی رایدەگەیەنێت، فۆرمی هێزی كار بە سەرجەم مامۆستایان و فەرمانبەران پڕدەكرێتەوە و جەختیشدەكاتەوە، ئەو فۆرمە بۆ وەرگرتنی زانیارییە لەسەر مامۆستایان و فەرمانبەران نەك بخرێنە هێزی كارەوە.
تریفە محەمەد، بەڕێوەبەری پەروەردەی ڕۆژهەڵات لە سلێمانی لە لێدوانێكدا بە تۆڕی میدیایی ئێستای راگەیاند، لەلایەن وەزارەتی پەروەردەوە داواكراوە مامۆستایان و فەرمانبەران فۆرمی هێزی كار پڕبكەنەوە كە تایبەتە بە وەرگرتنی زانیاری لەسەر مامۆستایان و فەرمانبەران و پڕكردنەوەی ئەو فۆرمە بۆ ئەوە نییە كە مامۆستایان و فەرمانبەران بخرێنە هێزی كارەوە وەكو ئەوەی پێشتر و لە ساڵانی ڕابردوودا جێبەجێكراوە، بەڵكو بۆ وەرگرتنی تەواوی زانیارییەكانە لەسەر مامۆستایان و فەرمانبەران.
بەڕێوەبەری پەروەردەی ڕۆژهەڵات زانیاریی زیاتر ئاشكرایكرد و وتیشی، “ئەو مامۆستایانەی مۆڵەتیان هەیە فۆرمەكەیان لەلایەن بەڕێوەبەری خوێندنگەكەوە بۆ پڕدەكرێتەوە، بەڵام دەبێت بنووسرێت ئەو مامۆستایە یاخود فەرمانبەرەكە مۆڵەتی وەرگرتووە”.
