وەزارەتی ناوخۆی عێراق گەڕاندنەوەی یەكێك لە تۆمەتبارانی تاوانی سپایكەر لە لوبنانەوە رادەگەیەنێت.
وەزارەتەكە لە راگەیەندراوێكدا ئاشكرایكرد، هێزەكانی پۆلیسی ئینتەرپوڵ سەر بە بەرێوەبەرایەتیی پۆلیسی عەرەبی و نێودەوڵەتیی وەزارەتی ناوخۆ، پاش هەوڵ و بەدواداچوونی هەواڵگریی، سەركەوتووبوو لە گەڕاندنەوەی (ع.ی.س.) تۆمەتبار بە تاوانی سپایكەر و داواكراو بەپێی ئەحكامی ماددەی 4ی تیرۆر، لە لوبنانەوە.
ئاشكراشیكردووە، گەڕاندنەوەی ئەو تۆمەتبارە بە هاوكاریی نێوان باڵیۆزخانەی عێراق لە لوبنان و دەزگای هەواڵگریی نیشتمانیی عێراق و بە هەماهەنگی بووە لەگەڵ ئینتەرپوڵی لوبنان.
لە ساڵی 2014 دوای ئەوەی گروپی داعش شاری تكریت-ی ناوەندی پارێزگای سەڵاحەدین-ی كۆنتڕۆڵكرد، ژمارەیەكی زۆر لە خوێندكارانی سەربازی لە بنكەی “سپایكەر” لە سنووری ئەو پارێزگایە بەدیل گرت و نزیكەی هەزار و 700 كەسیانی كۆمەڵكوژ كرد و تەرمی زۆرینەیانی هەڵدایە رووباری دیجلەوە.
