بافڵ جەلال تاڵەبانی سەرۆكی یەكێتیی نیشتمانیی كوردستان پەیامێكی پیرۆزبایی ئاراستەی محەمەد شیاع سودانی، سەرۆك وەزیرانی نوێی عێراق و سەرجەم وەزیرەكان دەكات و جەختیشدەكاتەوە، “یەكێتیی نیشتمانیی كوردستان باوەڕی تەواوی بە هەماهەنگی و كاری هاوبەش هەیە لەپێناو سەرخستنی كارنامەی حكومەتی نوێ”.
لە پەیامەكەی سەرۆكی یەكێتیدا هاتووە، “بەبۆنەی دەستپێكردنی ئەركی نوێ و متمانەپێبەخشینتان لە لایەن ئەنجومەنی نوێنەرانەوە پیرۆزباییەكی گەرمتان ئاراستە دەكەین و ئەمە سەرەتایەكی نوێ و هیوابەخشە بۆ جێبەجێكردنی ڕێكار و هەنگاوە دەستوورییەكان لەپێناو پێشكەشكردنی خزمەتگوزاری و بونیادنانی داهاتوویەكی سەقامگیر لە وڵاتدا”.
بافڵ جەلال تاڵەبانی جەختدەكاتەوە، “یەكێتیی نیشتمانیی كوردستان باوەڕی تەواوی بە هەماهەنگی و كاری هاوبەش هەیە لەپێناو سەرخستنی كارنامەی حكومەتی نوێ، پڕۆسەی چاكسازی و بەهێزتركردنی پایەكانی دەوڵەتداری و بەندەش هاوكار و پشتیوانتان دەبم لەپێناو بەدیهێنانی ئامانجە باڵاكان و پتەوكردنی پەیوەندییە نیشتمانییەكان كە ئەمەش خۆی لە پاراستنی مافە دەستوورییەكانی گەلی كورد و هەموو گەلانی عێراق و پێشكەشكردنی خزمەتگوزاریی زیاتر و تەبایی و پێكەوەژیاندا دەبینێتەوە”.
سەرۆكی یەكێتی دەشڵێت، “هیوادارین حكومەتی نوێ وەڵامدەرەوەی خواست و ویستی هەموو لایەك بێت و بەرەو بونیادنانی داهاتوویەكی گەشتر هەنگاوبنێت و جارێكیتر پیرۆزبایی لە ئێوە و سەرجەم وەزیرە بەڕێزەكان دەكەم و هیوای سەركەوتنتان بۆ دەخوازم”.
