لە كاتی خۆرگیراندا، باس لە زیانەكانی سەیركردنی خۆر بە شێوەیەكی راستەوخۆ لەسەر بینایی و چاوەكانی مرۆڤ دەكرێت، بەڵام تا ئێستا زانیوتە ئەو زیان و مەترسییانە چین؟
پسپۆڕانی چاو هۆشداریدەدەن لە زیانەكانی سەیركردنی خۆر لە كاتی خۆرگیراندا و دەڵێن، كاریگەریی گەورەی دەبێت لەسەر تەندروستیی چاوەكان و تێكدانی توانای بینین و تەنانەت لەدەستدانی بینایی.
دكتۆر دێرێ لەتیف پزیشكی پسپۆڕی چاو و نەشتەرگەریی چاوەكان رایگەیاند، “لە كاتی خۆرگیراندا بە هیچ شێوەیەك راستەوخۆ سەیری خۆر مەكە، چونكە لەو كاتەدا دەبێتەهۆی سووتانی خانەكانی تۆڕی چاو”.
لەبارەی هەمان پرسەوە، بەڕێوەبەرایەتیی کەشناسی و بومەلەرزەزانیی هەرێم هۆشداری دا لەوەی بینینی خۆرگیران دەبێتەهۆی لەدەستدانی بینینی هەمیشەیی و دەڵێت، “زیانەکان بە خێرایی روودەدەن بەبێ هەستکردن بە هیچ ئازارێک، بەڵام لەدەستدانی بینین تا دوای خۆرگیران روونادات”.
