كۆمپانیای بریتش پەترۆلیۆم دەڵێت، بەكاربردنی غازی سروشتی لە عێراق بە رێژەی 7% كەمیكردووە و لە كاتێكدا خاوەنی 12ـیەمین گەورەترین یەدەگی غازە.
بەپێی ئامارێكی كۆمپانیای بریتش پەترۆلیۆم كە كۆمپانیایەكی بەریتانیی بواری وزەیە، رێژەی بەكاربردنی غازی سروشتی لە عێراق لە ساڵی رابردوودا بەراورد بە ساڵی پێشتر 7.3% كەمیكردووە و 17.1 ملیار مەتر سێجا غازی بەكاربردووە.
بەشێكی زۆری ئەو غازە سروشتییەی عێراق بەكاریدەهێنێت لە ئێرانەوە هاوردە دەكرێت و بەشێكیشی بەرهەمی ناوخۆیە، بەڵام بریتش پەترۆلیۆم دەڵێت، دوای 10 ساڵ لە هەڵكشانی رێژەی بەكاربردنی غازی سروشتی لە عێراق، لە ساڵی رابردووەوە بەكاربردنی غاز كەمیكردووە.
سعودیە ریزبەندیی یەكەمی وڵاتانی عەرەبیی گرتووە لە بەكاربردنی غازی سروشتیدا وەك كۆمپانیا بەریتانییەكە ئاشكرایكردووە، بە جۆرێك ساڵی رابردوو 117.3 ملیار مەتر سێجا غازی سروشتیی بەكاربردووە و بە دوای ئەویشدا ئیمارات بە بەكاربردنی نزیكەی 70 ملیار مەتر سێجا غازی سروشتی لە پلەی دووەمدایە.
