یانەی ڕیاڵ مەدرید لە یاریی کلاسیکۆی قۆناغی یەکەمی لالیگا، بردنەوەیەکی گەورە و گرنگی بەرامبەر یانەی بەرشلۆنە تۆمارکرد.
ئەمشەو یەکشەممە، لە چێوەی یارییەکانی هەفتەی نۆیەمی خولی ئیسپانیا، یانەی ڕیاڵ مەدرید لە یاریگای “سانتیاگۆ بێرنابیۆ” میوانداریی یانەی بەرشلۆنەی کرد.
یارییەکە بە ئەنجامی سێ گۆڵ بەرامبەر بە گۆڵێک لە بەرژەوەندیی ئەستێرەکانی کارلۆ ئەنچیلۆتی کۆتاییهات.
گۆڵەکانی “لۆس بلانکۆس” لە خولەکەکانی 12، 35، 91 لەلایەن کەریم بنزیمە، فیدریکۆ ڤاڵڤێردی، ڕۆدریگۆ-وە تۆمارکران، تاکە گۆڵەکەی بەرشلۆنەش لە خولەکی 83 لەلایەن فیران تۆرێسەوە تۆمارکرا.
بەپێی ئەنجامە تۆمارکراوەکە، یانەی شاهانەی مەدرید بە کۆکردنەوەی 25 خاڵ و جیاوازی سێ خاڵ بەرامبەر بەرشلۆنە گەڕایەوە لووتکەی ڕیزبەندیی یانەکانی لالیگا، یانەی بەرشلۆنەش بە 22 خاڵەوە دابەزی بۆ پلەی دووەم.
