بەرەبەیانی ئەمڕۆ شەممە 5ی کانونی یەکەم، شاندی حکومەتی هەرێمی کوردستان لە بەغداد گەڕایەوە و بەپێی زانیارییەکان هەردوولا ڕێککەوتوون کە ڕێککەوتنی پێشووی هەرێم و بەغداد لە بودجەی ساڵی 2021دا جێگیربکرێت.
سەرچاوەیەک لە ئەنجومەنی وەزیرانی هەرێمی کوردستان بە تۆڕی میدیایی ئێستای وت، “شاندی هەرێم وبەغداد ڕێککەوتن لەسەر ئەوەی کە هەمان ڕێککەوتنی ساڵی پار لەناو پرۆژە یاسای بودجەی 2021 جێگیر بکرێت و ڕێژەی 12.6 ی پشکی هەرێمی کوردستان ڕەوانە بکرێت”.
ئەو سەرچاوەیە ئاماژەی بەوەشکردووە، “مەرجی بەغداد لە ناردنی پشکی هەرێم ئەوەیە، هەرێم 250هەزار بەرمیل نەوتی مانگانە لەگەڵ %50ی داهاتی خاڵە سنورییەکان ڕادەستی بەغداد بکات، لەبەرامبەردا عێراق بەناردنی 900 ملیار دیناری مانگانە بۆ هەرێم پابەندکراوە”.
باسیلەوەشکرد،” تۆپەکە ئێستا لەساحەی ئەندامانی لیژنەی دارایی ونوێنەرانی کورددایە کە نەهێڵن دەستکاری ئەو ڕێککەوتنە بکرێت چونکە ڕۆژی سێ شەممە، پرۆژە یاسایی بودجەیە لە ئەنجومەنی وەزیران پەسەند دەکرێت و ڕەوانەی ئەنجومەنی نوێنەرانی عێراق دەکرێت”.
