جۆ بایدن، سەرۆكی هەڵبژێردراوی ئەمریكا ڕایگەیاند، “سەرۆك ترەمپ، سەرۆكە چەوسێنەرەكانی لە ئامێزدەگرت و كارێكی كرد ئێران نزیكببێتەوە لە دروستكردنی چەكی ئەتۆمی.”
ئەم وتانەی بایدن، لە چاوپێكەوتنێكیدا بوو لەگەڵ تۆڕی هەواڵی “CNN” كە ئەمڕۆ هەینی 4ی كانونی یەكەم بڵاوكراوەتەوە. سەرۆكی هەڵبژێردراوی ئەمریكا، ڕەخنەی لە دۆناڵد ترەمپ گرت بەوەی بووەتە هۆكاری دووركەوتنەوەی ئەوروپا لە ئەمریكا و وتی، “سەرۆك ترەمپ، سەرۆك و سەركردە دیكتاتۆر و چەوسێنەرەكانی لە ئامێزدەگرت، ئەوەش وایكرد كە وڵاتانی ئەوروپا لە ئەمریكا دووربكەونەوە، بۆیە ئاساییكردنەوەی پەیوەندییەكانی ئەمریكا و وئەوروپا، دانوستاندنی سەختی پێویستە.”
جۆ بایدن لە چاوپێكەوتنەكەدا باسی لە هەوڵەكانی ئێران بۆ بەدەستخستنی چەكی ئەتۆمی كرد و لەو بارەیەشەوە ڕەخنەی لە ترەمپ گرت و ڕایگەیاند، “سەرۆك لە ڕێككەوتننامەی ئەتۆمی كشایەوە بۆ ئەوەی ئەنجامێكی باشتر بەدەستبهێنێت، بەڵام بە پێچەوانەوە ئەوە ئێرانی نزیككردەوە لە بەدەستهێنانی چەكی ئەتۆمی و ئێستا ئەو وڵاتە توانا ئەتۆمییەكانی زیاترن.”
