ڕووداوێكی تری هاتوچۆ لەسەر ڕێگای سلێمانی – دەربەندیخان ڕوویدا و بارهەڵگرێك وەرگەڕا.
دوای ئەوەی تونێلی دەربەندیخان بە مەبەستی نۆژەنكردنەوە بەڕووی شۆفێراندا داخرا و هەردوو ڕێگای سەرشاخ و ناوتاقان وەك جێگرەوە بەكاردەهێنرێن، ئەمڕۆ چوارشەممە یەكەم ڕووداوی هاتوچۆ لەو ڕێگایەی بە “سەرشاخ” ناسراوە ڕوویدا.
ڕووداوەكە لە جۆری وەرگەڕانە، ئۆتۆمبێلێكی بارهەڵگر بەهۆی لەدەستدانی كۆنترۆڵەوە وەرگەڕاوە، بەڵام زیانی گیانیی لێنەكەوتووەتەوە و شۆفێرەکە سەلامەتە.
ڕووداوەكانی هاتوچۆ لەسەر ڕێگای سلێمانی – دەربەندیخان – كەلار بوونەتە دیاردەی نیمچەڕۆژانە، تەنها لەم هەفتەیەدا چەند ڕووداوێكی هاتوچۆ لەسەر ئەو ڕێگایە ڕوویانداوە، دیارترینیان ئەو ڕووداوە بوو كە لە نێوان دوو ئۆتۆمبێلی تایبەت و بارهەڵگردا ڕوویدا و بووەهۆی گیانلەدەستدانی پێنج پێشمەرگە.
