پەرلەمانتارێكی پێشووی گۆڕان لە پەرلەمانی كوردستان ڕایدەگەیەنێت، دواخستنی هەڵبژاردن لە هەرێمی كوردستان هیچ بیانوویەك هەڵناگرێت و جەختیشدەكاتەوە، “ئەگەر گۆڕان دەنگبدات بە درێژكردنەوەی تەمەنی پەرلەمان لادانە لە ڕێبازی بزوتنەوەكە”.
عەبدولرەحمان عەلی پەرلەمانتاری پێشووی گۆڕان لە لێدوانێكدا بە تۆڕی میدیایی ئێستای ڕاگەیاند، درێژكردنەوەی تەمەنی پەرلەمان و دواخستنی هەڵبژاردن لەم دۆخەی ئێستادا هیچ بیانوویەك هەڵناگرێت و یەكێك لە گرفتە گەورەكان نەبوونی دەستوورێكە بۆ هەرێمی كوردستان كە بتوانرێت چوار ساڵ جارێك لە دەستووردا هەڵبژاردن دیاریبكات و بیانوو بۆ دواخستنی هەڵبژاردن نەهێندرێتەوە.
ڕاشیگەیاند، درێژكردنەوەی تەمەنی پەرلەمان پڕۆسەی سیاسیی هەرێمی كوردستان دەخاتە ژێر پرسیارەوە و بزوتنەوەی گۆڕان پێشتر دژی درێژكردنەوەی تەمەنی پەرلەمان بووە و پێموانییە لەم خولەشدا كار بۆ درێژكردنەوەی تەمەنی پەرلەمان بكات و ئەگەر گۆڕان دەنگبدات بە درێژكردنەوەی تەمەنی پەرلەمان لادانە لە ڕێبازی بزوتنەوەكە.
