لای بەشێکمان خواردنەوەی قاوە بەشێکە لە ڕۆتینی ڕۆژانە، توێژینەوەیەکی نوێی تەندروستیش سەلماندوویەتی خواردنەوەی دوو کوپ یان سێ کوپ قاوە لە ڕۆژێکدا چەندین سوودی تەندروستی هەیە.
ئەنجامی توێژینەوەکە لە گۆڤاری ئەوروپی بۆ نەخۆشییەکانی دڵ و خۆپاراستن لێیان بڵاوکراوەتەوە، لەبەشێکیدا باسلەوەکراوە،” خواردنەوەی قاوە وەک بەشێک لە ڕۆتینی ڕۆژانە تەمەن درێژ دەکات”.
توێژەران دەڵێن،” خواردنەوەی قاوە ڕێژەی تووشبوون بە نەخۆشییەکانی دڵ و خوێنبەرەکان کەمدەکاتەوە”.
پیتەر کیستلەر، نوسەری توێژینەوەکە ئاشکرایکرد، ” کافایین یەکێکە لە ناسراوترین پێکهاتەکانی ناو قاوە، بەڵام لە ڕاستیدا زیاتر لە 100 پێکهاتەی چالاکی بایلۆجی لەخۆی گرتووە”.
لە توێژینەوەکەدا کە 449 هەزار و 563 کەس بەشداریان تێداکردووە، تێبینی ئەوەکراوە. خواردنەوەی هەر جۆرێک لە جۆرەکانی قاوە( بێ کافایین، قاوەی هاڕاو) یان هەر جۆرێکی دیکەی قاوە، کاریگەری لەسەر کەمکردنەوەی مەترسییەکانی تووشبوون بە نەخۆشییەکانی دڵ و خوێنبەرەکان و مەترسی مردنی پێشوەختە کەمدەکەنەوە.
