تەلار لەتیف لێپرسراوی ناوەندی كاروباری یاسایی یەکێتی نیشتیمانی کوردستان ڕایگەیاند، هەمواركردنەوەی پەیرەوی ناوخۆی یەكێتیی نیشتمانی كوردستان تەواو بووە، بەپێی گۆڕانکارییە نوێیەکانیش هەر لێپرسراو و كادرێكی یەكێتی توندوتیژی بەرامبەر ژن بكات، سڕ دەكرێت.
تەلار لەتیف لێپرسراوی ناوەندی کاروباری یاسایی یەکێتی نیشتیمانی کوردستان بە میدیای حیزبەکەی ڕاگەیاند، ” دوای ئەوەی 88 ئەندامی ئەنجومەنی سەركردایەتی داوایەكیان پێشكەشكرد بەمەبەستی هەموارکردنەوەی پەیڕەوی ناوخۆ، ئێستا كاری هەمواركردنەوەكە تەواو بووە، هەموار و گۆڕانكارییەكان تەواو پەیڕەویی و یاسایی بووە و گرنگترین گۆڕانگاریی هەڵوەشاندنەوەی سیستمی هاوسەرۆكی و دانانی “سەرۆك”ە بۆ یەكێتیی و لەسەر ئەو بنەمایە رێكخراوەتەوە”.
ئاماژەی بەوەشکرد، ” پێشتر هەر لێپرسراوی مەكتەبێك دەبوو بە ئەندامی مەكتەبی سیاسیی، لە هەموارەكەدا ئەو مەرجە لابراوە و ئەو هەڤاڵەی دەبێتە ئەندامی مەكتەبی سیاسیی مەرج نییە مەكتەب و ئۆرگانی لە لابێت، جگە لەوەش ژمارەی ئەندامانی مەكتەبی سیاسیی و دەستەی كارگێریی زیاد دەكات لە بەر پێویستی و زیادكردنی ئەرك و ئیشوكارەكان”.
ئاشکراشیکرد، ” لە هەموارەکەدا ڕۆڵ و پێگەی ژن پارێزراوە و چەسپێندراوە و ڕێژەكە بۆ 25% زیادكراوە، لەوەش گرنگتر هەر كادرێكی یەكێتی لە هەر ئاستێكی لێپرسراوێتیدا بێت، ئەگەر توندوتیژی بەرامبەر بەژنان بكات، ئەوا بەپێی هەمواری پەیرەو سزا دەدرێت و سڕدەكرێت”.
