جێگری سەرۆک وەزیرانی هەرێم، رایگەیاند، “لە نزیکترین دەرفەتدا یەکێتی و پارتی دەگەنە رێککەوتنی کۆتایی”.
قوباد تاڵەبانی، جێگری سەرۆک وەزیرانی هەرێم، لە پەراوێزی کۆڕبەندی نێودەوڵەتیی دێڵفی لەگەڵ نیکۆس دێندیاس، وەزیری بەرگریی یۆنان کۆبووەوە و پێکەوە دۆخی ئاسایش و سەقامگیریی ناوچەکەیان تاوتوێ کرد.
لە کۆبوونەوەکەدا کە رۆژی هەینی(11/4/2025) بە ئامادەبوونی هەر یەکە لە دارا رەشید، وەزیری پلاندانان و دابان شەدەڵە، جێگری لێپرسراویی فەرمانگەی پەیوەندییەکانی دەرەوەی هەرێم بەڕێوەچوو، گفتوگۆکرا لەبارەی دۆخی ئاسایش و سەقامگیریی ناوچەکە و چۆنییەتی بەرەنگاربوونەوەی تیرۆر، هەردوولا هاوڕابوون کە پێویستە ئاستی هاوکارییە ئەمنی و سەربازییەکان بۆ پاراستنی سەقامگیری زیاتر بکرێت.
سەبارەت بە پەیوەندییەکانی نێوان هەرێمی کوردستان و وڵاتی یۆنانیش، جەختکرایەوە لەسەر پێویستیی بەهێزترکردنی هەماهەنگی و هاوکاری لەنێوان دامەزراوە ئەمنی و سەربازییەکانی هەردوولا، بە تایبەتیش لە پرسی بەرەنگاربوونەوەی تیرۆردا.
لە تەوەرێکی دیکەدا باسی دۆخی سیاسیی ناوخۆی هەرێم و هەوڵەکانی پێکهێنانی کابینەی نوێی حکومەتی هەرێم کرا، لەمبارەیەوە جێگری سەرۆک وەزیران روونیکردەوە، “هەنگاوی زۆر باش نراوە و بەپێی ئەو لێکتێگەیشتنەی کە ئێستا هەیە، گفتوگۆکانی نێوان پارتی و یەکێتی بەردەوامدەبن و گەشبینین لە نزیکترین دەرفەتدا بگەنە رێککەوتنی کۆتایی”.
