مامۆستایەك دەستگیركرا كە دوای فریودانی كچە خوێندكارێك، دەستدرێژیی سێكسیی كردووەتەسەری.
بەپێی سەرچاوەكانی هەواڵی مەغریب، مامۆستاكە لە خوێندنگەیەكی شاری قەسڕ كەبیری ئەو وڵاتە وانەی زمانی فەرەنسیی دەوتەوە و یەكێك لە كچە خوێندكارەكانی فریوداوە و بەڵێنی ئەوەی پێداوە كە هاوسەرگیریی لەگەڵدا دەكات، بەڵام دەستدرێژیی سێكسیی كردووەتەسەری و بەجێیهێشتووە.
ئەو مامۆستایە لەگەڵ ئەوەی خێزاندارە، جگە لە فریودانی ئەو كچە خوێندكارە، كچێكی دیكەی فریوداوە و بە هەمان شێوە پەیوەندیی سۆزداریی لەگەڵدا هەبووە و بەڵێنی هاوسەرگیریی پێداوە.
ڕۆژنامەی “هێسپرێس”ی مەغریبی دەڵێت، دوای ئاشكرابوونی كەیسەكە و سكاڵای خوێندكارەكە، ئەو مامۆستایە دەستگیركراوە و لە ژێر چاودێری و پاسەوانیی تونددا چاوەڕوانی دادگاییكردنە.
