یەکێتیی زانایان: پڕۆژە یاسای بەرەنگاربوونەوەی توندوتیژیی دژی ژنان دژی واقعی کۆمەڵگایە

یەکێتیی زانایانی ئیسلامیی کوردستان ڕوونکردنەوەیەکی لەبارەی پڕۆژە یاسای بەرەنگاربوونەوەی توندوتیژیی دژی ژنان بڵاوکردەوە و ڕایگەیاندووە، پڕۆژە یاساکە دژی نەریت و واقعی کۆمەڵگایە.

لە ڕاگەیەندراوێکدا یەکێتیی زانایانی ئیسلامیی کوردستان ئاشکرایکرد، ” دوای گەنگەشەکردنی پڕۆژە یاسای بەرەنگاربوونەوەی توندوتیژیی خێزان و ئافرەت لە پەرلەمانی کوردستان، لێکەوتە و دەنگدانەوەی خراپی لێکەوتەوە، ئێمە لە یەکێتیی زانایان لەڕوانگەی هەستی بەرپرسیارێتی و ئەرکی پیشەیی خۆمان چاومان بە پڕۆژە یاساکە کەوتووە”.

ئاماژە بەوەشکراوە، لە بڕگەیەکی ماددەی دووەمی پێشنیازە یاسای بەرەنگاربوونەوەی توندوتیژیی خێزان و ئافرەت هاتووە، “بەزۆر سەرجێییکردن لەگەڵ هاوسەردا” بە تاوانی توندوتیژی خێزانی و دژبە ئافرەت دابنرێت و ئەمەش مشتومڕێکی زۆری خستووەتە نێو پەرلەمانەوە.

یەکێتیی زانایان دەڵێت، “ئەم پرۆژە یاسایە لەگەڵ بنەماکانی شەریعەتی ئیسلام ناگونجێ و پێچەوانەی نەریت و واقعی کۆمەڵگەی کوردی و ئاشتی کۆمەڵایەتیە و، ئەگەری لێکەوتەی خراپی بۆ سەر شیرازەی خێزان هەیە”.

داواش لە پەرلەمان دەکات، “پڕۆژەی نەگونجاو بە کەلتور و واقعی میللەتەکەمان نەخاتە بەرنامەی کار و هەوڵی بە یاسا کردنی نەدات، چونکە دەرکردنی یاسا بۆ خزمەت و بەرژەوەندیی هاووڵاتییان و کۆمەڵگەیە نەک زیاترکردنی ئاریشە”.

بابەتی پێشتر

لە هەولێر هۆتێلێک بەهۆی بێزارکردنی گەڕەکێک داخرا

بابەتی دواتر

پێشکەشکارێکی CNN چاوپێکەوتنی لەگەڵ ڕەئیسی ڕەتکردەوە بەهۆی ئەوەی داوایکردبوو قژی داپۆشێت

بابەتی پەیوەندیدار
Total
0
Share