بەڕێوەبەری ژمێریاری لە بەڕێوەبەرایەتیی پەروەردەی ڕۆژهەڵات ڕایدەگەیەنێت، چەكی پارەی مانگی حەوت بۆ مامۆستایانی وانەبێژ ئامادەكراوە و بەهۆی نەبوونی پارە لە بانكدا كرێی وانەبێژییەكەیان بۆ خەرجنەكراوە و هەر كاتێك پارە لە بانكدا هەبێت كرێی وانەبێژی مانگی تەمموزیان بۆ خەرجدەكرێت.
ئامانج سلێمان بەڕێوەبەری ژمێریاری لە بەڕێوەبەرایەتیی پەروەردەی ڕۆژهەڵات لە لێدوانێكدا بە تۆڕی میدیایی ئێستای ڕاگەیاند، چەكی پارەی تایبەت بە كرێی وانەبێژی بۆ مامۆستایانی وانەبێژ ئامادەكراوە، بەڵام بەهۆی نەبوونی پارە لە بانكەكاندا بۆیان خەرج نەكراوە و هەر كاتێك پارە لە بانكدا هەبێت بۆیان خەرجدەكرێت.
ئاشكرایكرد، مامۆستایانی وانەبێژ لە مانگی حەوتی ئەمساڵدا بەشە وانەیان نەبووە، بەڵام ئاگاداركراوینەتەوە كە پارەی وانەبێژی بۆ مامۆستایانی وانەبێژ خەرجبكرێـت و هیچ ڕێنماییەك بۆ مانگی ئاب نەهاتووە.
لەبارەی خەرجكردنی كرێی وانەبێژی بۆ مانگی ئەیلول، بەڕێوەبەری ژمێریاری پەروەردەكە ڕایگەیاند، بەپێی ڕێنماییەكان دەبێت مانگی نۆ تەواو بێت و بەڕێوەبەری خوێندنگەكان ئاگاداردەكرێنەوە بەشە وانەی مامۆستایانی وانەبێژ بنێرێن بەپێی ڕێنماییەكان كرێی وانەبێژی بۆ مانگی نۆ خەرجدەكرێت.
