جێگری سەرۆكی ڕێكخراوی یەكێتیی مامۆستایانی كوردستان ڕایدەگەیەنێت، پڕۆژەی نیشتەجێبوونی شاری دووی مامۆستایان لە سلێمانی جێبەجێدەكرێت، جەختیشدەكاتەوە زەوی بۆ دروستكردنی یەكەكان تەرخانكراوە و تەنها چەند ڕێكارێكی كارگێری ماوە و دەخرێتە بواری جێبەجێكردنەوە.
عەبدولواحید محەمەد، جێگری ڕێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای ڕاگەیاند، ئەو پڕۆژە نیشتەجێبوونانەی بۆ كرێنشینان و كەمدەرامەتان دروستدەكرێن، مامۆستایانیش دەتوانن سوودمەندببن و وەكو یەكێتیی مامۆستایان پڕۆژەی تایبەت بە خۆمان بۆ مامۆستایان هەیە.
ئاشكرایكرد، پێشتر لە هەولێر، سلێمانی و گەرمیان یەكەی نیشتەجێبوون بۆ مامۆستایان دروستكراون و بڕیارە لە شاری سلێمانی شاری دووی مامۆستایان جێبەجێبكرێت و زەوی بۆ تەرخانكراوە و چەند ڕێكارێكی كارگێری ماوە كە لە بەرژەوەندیی مامۆستایان جێبەجێدەكرێت و وەجبەی یەكەم 1950 یەكەی نیشتەجێبوون بۆ مامۆستایان دروستكراون بۆ قۆناغی دووەم كەمتر دەبێت و یەكەكان دەدرێتە مامۆستایان كە سوودمەندنەبوون.
