ئەو ڕۆنانەی لە بازاڕەکاندا هەن بە شێواز و قەبارەی جیاواز، مشتومڕی تەندروستیی زۆریان لەبارەوە دەکرێت، زۆرینەی قسەکان بۆ ئەوەن کە تەندروست نین و هۆکاری زۆر جۆری نەخۆشین لە گرنگترینیان گیرانی لولە خوێنەکانی دڵ و شێرپەنجە.
تۆڕی میدیایی ئێستا بەدواداچوونێکی بۆ ئەو ڕۆنانە کردووە و ئەنجامەکەی جگە لە دەرخستنی زیانەکانی شێوازی دروستی بەکارهێنانیشیان دەخاتەڕوو.
ڕۆنی زەیت:
شارەزایەکی بواری خۆراک لەوبارەیەوە بە تۆڕی میدیایی ئێستای وت، زەیتە ڕووەکییەکان لە بنەڕەتدا جۆرێکی بەسوودن، بەڵام ئەوەی لە بازاڕەکاندا هەن دەستکاری لە پرۆسەی بەرهەمهێنانیاندا دەکرێت، بەوەش زەیتەکە سروشتی خۆی لەدەستدەدات و دەگۆڕێت بۆ زەیتێکی زیانبەخش.
زەیتە بازرگانییەکان و ئەوانەی ئێستا لە بازاڕەکاندا هەن، بە پرۆسەیەک کە گەرمکردنییەتی تا 400 پلەی سەدی زۆرینەی بەها خۆراکییەکەی لەدەستدەدات و ڤیتامین و کانزاکانی لەناودەچن.
ئەو پسپۆڕە خۆراکییە دەڵێت، ئەو زەیتانە لەکاتی بەکارهێناندا جارێکی دیکە گەرمدەکرێن کیتۆن و ئەڵدیهاید دروستدەکەن کە هۆکاری گەورەن بۆ تووشبوون بە شێرپەنجە.
باسی لە دورستکردن و بەرهەمهێنانی زەیت کرد بەڕێگەی پەستانی سارد و گوشین، کە ئەوە ڕێگایەکی تەندروستە و ڤیتامین و کانزاکانی لەناوناچن.
ڕۆنە بەستووەکان:
دوو جۆر ڕۆنی بەستوو هەن کە یەکێکیان ڕۆنە ئاژەڵییەکانە، ئەو پسپۆڕە خۆراکییە ئاماژەی بۆ ئەوەکرد، ڕۆنە ئاژەڵییەکان تەندروستن بەڵام نابێت ڕێژەی زۆریان لێ بخورێت، چونکە چەورییە تێرەکان لە پێکهاتەیاندایە و هۆکارن بۆ تەسکبوونەوەی بۆرییەکانی خوێن و نەخۆشییەکانی دڵ و جەڵتە.
جۆری دووەم لە ڕۆنە بەستووەکان ڕۆنە ڕووەکییەکانن: ئەم ڕۆنانە لە زەیتی ڕووەکییەوە بەرهەمدەهێنرێت بە زیادکردنی هایدرۆجین بۆی، کە مەترسیدارە و هۆکاری شێرپەنجەیە، هەروەها ڕێژەی کۆلیسترۆڵی زیانبەخش تێیدا بەرزدەبێتەوە و کۆلیسترۆڵی سوودبەخش کەمدەبێتەوە.
بەپێی وتەی پسپۆڕە خۆراکییەکە، ئەو ڕۆن و زەیتانەی لە بازاڕدا هەن پشکنینی پێویستیان بۆ ناکرێت، چونکە لایەنی پەیوەندیدار ئامێر و کەرەستەی پێویستییان لەبەردەستدا نییە بۆ پشکنین، ناتوانرێت پشکنینی وردیان بۆبکرێت ئەوەی دەکرێت تەنها هەندێک پشکنینی سەرەتاییە.
وتی، ئەگەر ئەو ڕۆن و زەیتانە هەرچییەک لە پێکهاتەکانیاندا هەبێت یان چەندجارێک بەکارهاتبێتەوە ناتوانرێت لە پشکنینەکاندا دەربخرێن چونکە ئاستی پشکنینەکانی ئێرە ئەو توانایەیان نییە.
ئاماژەی بۆ ئەوەشکرد، ئەو پشکنینانەی لێرە بۆ ڕۆن و زەیت دەکرێن بەپێی ستانداردە جیهانییەکان نین، ئەوەش ناتوانێت بڕیار لەسەر ئەوە بدات ڕۆنەکان چەند تەندروست و سەلامەتن، تا چەند موشتەقاتی کیمیایی تێنەکراوە، یاخود زەیتی ڕیسایکلین نییە و پێشتر بەکارنەهێنراوە و ڕیسایکلینی بۆ نەکراوەتەوە.
سەبارەت بە بەکارهێنانی ڕۆنێکی تەندروست ئەو پسپۆڕە خۆراکییە باس لەوەدەکات، هەر جۆرێکی ڕۆن پشتدەبەستێت بە سەرچاوەکەی و چۆنێتیی بەرهەمهێنان و هەڵگرتنی کە ئەگەر بەشێوەی تەندروست بەرهەمبهێنرێت زیانی تەندروستیی نابێت، ئەوەش دڵنیابوونەوەی پەیوەندیدارە بە شێوازی پشکنینەکانی ڕۆنەکەوە.
