ئەنجومەنی پارێزگای هەولێر ڕەتیدەكاتەوە، سەرۆكی ئەنجومەنەكە داوای دانانی كامێرای پۆینت تو پۆینتی كردبێت و جەختیشدەكاتەوە، لە دەسەڵاتی ئەنجومەندا نییە بڕیاری وەزارەتەكان ڕەتبكاتەوە.
بەپێی ڕاگەیەندراوێكەی نووسینگەی ڕاگەیاندنی ئەنجومەنی پارێزگای هەولێر كە وێنەیەكی دەست تۆڕی میدیایی ئێستا كەوتووە و تێیدا هاتووە و دوای ئەوەی لە تۆڕە كۆمەڵایەتییەكان بڵاوكراوەتەوە گوایە عەلی ڕەشید، سەرۆكی ئەنجومەنی پارێزگای ھەولێر داوایكردووە كە كامێرای پۆینت تو پۆینت لە ھەولێر دابندرێت، ئەم بابەتە دوورە لە ڕاستییەوە و سەرۆكی ئەنجومەن لە دەسەڵاتیدا نییە بڕیاری وەزارەتەكان ڕەتبكاتەوە.
لە ڕاگەیەندراوەكەدا هاتووە، ئەم بڕیارە بڕیاری وەزارەتی ناوخۆیە و لەسەر ئاستی هەرێمی كوردستاندا جێبەجێدەكرێت و ڕێنمایی تایبەت بە تۆماركردنی خێرایی ئۆتۆمبێل دەربكرێت بە جۆرێك لەگەڵ شەقامەكانی هەرێمی كوردستاندا بگونجێت.
ئاماژە بۆ ئەوەش كراوە ، “هەربڕیارێك بدەین پێویستە لە كۆبوونەوەی ئەنجومەنی پارێزگا بەدەنگدان یەكلابكرێتەوە و سیستمێكی نوێی كامێرای پۆینت تو پۆینت دابندرێت كە سەلامەتیی ھاوڵاتییانی تێدا ڕەچاو بكرێت تا هاوڵاتییان زەرەرمەندنەبن”.
