ئەندامێكی ئەنجومەنی نوێنەرانی عێراق ڕایدەگەیەنێت، نیگەرانی و داواكارییەكانی وەزارەتی پەروەردەی هەرێمی گەیاندووەتە سەرۆك وەزیرانی عێراق.
سۆران عومەر، ئەندامی ئەنجومەنی نوێنەرانی عێراق لە هەژماری تایبەتیی خۆی لە تۆڕی كۆمەڵایەتیی فەیسبووك نووسویەتی، “نیگەرانی و داواکاریی وەزارەتی پەروەردەی هەرێمی کوردستانم گەیاندە سەرۆک وەزیرانی عێراق”.
باسی لەوەشكردووە، بەپێی ڕێکەوتنی عێراق و چین دەست بە درووستکردنی هەزار خوێندنگە كراوە و دوێنێ سەرۆك وەزیرانی عێراق بەردی بناغەیانی دانا، بەڵام بەداخەوە هەرێمی کوردستانی لێ بێبەشکرا.
بەپێی وتەی ئەو پەرلەمانتارە ئەو ڕێككەوتنە لەکاتێکدا واژووكرا كە پارێزگارەکانی هەولێر و دهۆک و سلێمانی لەو شاندە بەشداربوون کە لەگەڵ سەرۆک وەزیرانی ئەوکاتی عێراق چوونە وڵاتی چین.
