مەروە كچێكی میسرییە لە شاری ئەسوان دەژی، كاری ڕۆژانەی فرۆشتنی “كلینكس”ـە وەك میدیای ئەو وڵاتە بڵاویكردەوە، بەڵام ڕێكەوتێكی تێكەڵ بە هەوڵ و پێداگیریی خۆی، كردی بە براوەی خەڵاتێكی ئاڵتوونی.
ئەم كچە تەمەن 10 ساڵانە، لە دووەرەوە ماراسۆنێكی بینیوە كە لە شاری ئەسوانی ناوەندی پارێزگای ئەسوانی میسر ڕێكخرابوو، بە ڕاكردن خۆی پێگەیاندووە و داوایكردووە ڕێگەی بدەن بەشداریبكات، بەڵام ئەو پارەیەی پێنەبووە كە بڕەكەی 200 جونەیهی میسری بووە و دەبوو لە بەرامبەر بەشداریكردنی لە ماراسۆنەكەدا بیدات، بەو پێیەی ماراسۆنەكە خێرخوازی بووە و مەرجی بەشداریكردن تیایدا، پارەدان بووە.
بەپێی میدیای میسری، ڕێكخەرانی ماراسۆنەكە “وەك پشتیوانییەكی دەروونی”، ڕێگەیان بە مەروە داوە بەشداریی ماراسۆنەكە بكات، سەرباری ئەوەی جل و كالەی وەرزشیی نەبووە، بە خێراییەكی زۆر ڕایكردووە و توانیویەتی پلەی یەكەم بەدەستبهێنێت و مەدالیای خەڵاتی ئاڵتوونیی پێبەخشراوە.
