ئه‌مشه‌و چوارشه‌ممه، یارییه‌کانی هه‌فته‌ی پێنجه‌می خولی نایابی ئینگلیزی ئه‌نجامدران، یانه‌کانی ئارسیناڵ و مانچسته‌ر سیتی له یاریگای خۆیاندا بردنه‌وه‌یان تۆمارکرد.
ئارسیناڵ له یاریگای “ئیماراتس” میوانداریی ئه‌ستۆن ڤێلای کرد، یارییه‌که به ئه‌نجامی دوو گۆڵ به‌رامبه‌ر به گۆڵێک له به‌رژه‌وه‌ندیی ئه‌ستێره‌کانی مایکڵ ئارتێتا کۆتاییهات.
گۆڵه‌کانی “گانه‌رز” له خوله‌که‌کانی 30، 77 له‌لایه‌ن گابریێل جیسۆز و مارتینێلی-یه‌وه تۆمارکران، گۆڵه‌که‌ی “ڤێلانس” له خوله‌کی 74 له‌لایه‌ن دوگلاس لویزه‌وه تۆمارکرا.
له یارییه‌کی به‌هێزی دیکه‌دا، یانه‌ی مانچسته‌ر سیتی له یاریگای “ئیتیحاد” به ئه‌نجامی شه‌ش گۆڵی بێوه‌ڵام له نۆتنگهام فۆرێستی برده‌وه.
سیان له گۆڵه‌کانی سیتی له خوله‌که‌کانی 12، 23، 38 له‌لایه‌ن ئێرلینگ هالانده‌وه تۆمارکران، ژماره‌ی گۆڵه‌کانی له‌م وه‌رزه‌دا گه‌یانده (نۆ گۆڵ)، گۆڵه‌کانی دیکه‌ش له خوله‌که‌کانی 50، 65، 87 له‌لایه‌ن جواو کانسێلۆ، جولیان ئالڤارێزه‌وه تۆمارکران (دوو گۆڵ).
به‌پێی ئه‌نجامه تۆمارکراوه‌کان، ئارسیناڵ ژماره‌ی خاڵه‌کانی گه‌یانده 15 و له پله‌ی یه‌که‌می ڕیزبه‌ندیی یانه‌کانی پریمه‌رلیگدا به جێگیری مایه‌وه، مانچسته‌ر سیتی ڕکابه‌ریشی به 13 خاڵه‌وه له پله‌ی دووه‌مدا به‌رده‌وام بوو.
ئه‌نجامه‌کانی دیکه:
لیڤه‌رپوڵ 2-1 نیوکاسڵ
وێستهام 1-1 تۆتنهام
