بەڕێوەبەری هێزەكانی دژەتیرۆر ڕایدەگەیەنێت، “بەرپرسیارێتیی پاراستنی ئاسایشی گشتی لە ئەستۆی ئێمەدایە و هەموومان پێكەوە كاراكتەری سەرەكیی چاكسازی و گۆڕانكاریین بە كردار سەلماندوومانە بە جەستە و خوێن لەگەڵ پرۆژەی چاكسازیی یەكێتی و سەرۆك بافڵ جەلال تاڵەبانین و كارەكانیشمان لەگەڵ هەڤاڵانی هێزەكانی كۆماندۆ ئەوە دەردەخەن بۆ هەمیشە لە بەرەی ڕەسەنی گۆڕانكاری و چاكسازی و ڕێبازی ڕاستەقینەی خزمەتكردندا دەمێنینەوە”.
وەهاب هەڵەبجەیی بەڕێوەبەری هێزەكانی دژەتیرۆر ڕایگەیاند، “ئێمە فێرنین خەڵك و حزب و سەركردەكانمان بۆ كورسی و پۆست و بەرژەوەندیی كەسی بفرۆشین، وەك ئەو نا بەرپرسانەی پێشتر پۆستەكانیان بۆ بەرژەوەندیی خۆیان و خێزانەكانیان بەكاردەهێنا و هەركەسێك پێچەوانەی ئەم بیر و بۆچوونە لەكارەكانمان بڕوانێت چەواشەكار و تێكدەر و لادەرە دەتوانن بەكاری چاكسازی و ڕێگریكردن لە قۆرخكاری و گەندەڵی بمانناسنەوە بەری خۆری گۆڕانكارییەكانمان بەبێژنگی چەواشەكاریی ئێوە ناگیرێت”.
بەڕێوەبەری هێزەكانی دژەتیرۆر دەشڵێت،” بەو پەڕی ڕاشكاوییەوە دەیڵێم، لەهەر شوێن و جێگەیەك خەڵك و حزب و حكومەت پێویستی بەهێزی ئێمەبێت بۆ چاكسازی ڕێگری لە گەندەڵكاران ئامادەین و سەرقافڵەی كاروانەكە دەبین”.
ڕاشیگەیاند، “دەتوانن وەك هەمیشە لەم ڕێبازە ڕاستەقینەدا تاقیمان بكەنەوە، هەركارێك بكەین بۆ بەرژەوەندیی خەڵكە هەرگیز وەك چاوبرسییەكانی پێش گۆڕانكارییەكانی ناو حزبی شەهیدان نەمانویستووە و نامانەوێت گیرفانی خۆمان پڕبكەین و خەڵكیش برسی بكەین”.
