له ئه‌نجامی هێرشێكی چه‌كدارانی داعش، بۆ سه‌ر باره‌گایه‌كی سوپای عێراق له پارێزگای سه‌ڵاحه‌دین، پێنج سه‌رباز برینداربوون.
نه‌قیب سه‌عد محه‌مه‌د، لە فه‌رمانده‌یی ئۆپه‌راسیۆنه‌كانی پارێزگای سه‌ڵاحه‌دین ئەمڕۆ دووشەممە 30ی تشرینی دووەم وتی، “چه‌كدارانی داعش هێرشیان كردووه‌ته‌سه‌ر باره‌گای فه‌وجی مه‌غاویر، له شارۆچكه‌ی موته‌یبیجه له پارێزگای سه‌ڵاحه‌دین”.
وتیشی، “هێرشه‌كه برینداربوونی سێ سه‌رباز و دوو ئه‌فسه‌ری لێكه‌وتووه‌ته‌وه كه یه‌كێكیان فه‌رمانده‌ی فه‌وجه”.
چه‌كدارانی داعش چه‌كی سووكیان به‌كارهێناوه له هێرشه‌كه‌دا، وەك ئەوەی ئەفسەرەكە باسیكرد.
ئاماژەی بەوەشكرد، چه‌كداره‌كان له‌دوای هێرشه‌كه هه‌ڵاتوون و هێزه‌كانی سوپا ده‌ستیان به هه‌وڵه‌كانیان كردووه به‌مه‌به‌ستی دۆزینه‌وه‌یان.
