سەرچاوەکانی هەواڵ ئاماژە بە بێزاری چەند یاریزانێکی یانەی مانچستەر یونایتد دەکەن لە کریستیانۆ ڕۆناڵدۆ.
ڕۆژنامەی “زە سەن”ی بەریتانی لە زاری سەرچاوەیەکی ناوخۆیی مانچستەر یونایتدەوە ئاشکرای کردووە، دۆخی ژووری جلگۆڕینەکان ناجێگیرە و هۆکارەکەش یەکلایی نەبوونەوەی دۆسیەی ڕۆیشتن، یاخود بەردەوامبوونی کریستیانۆ ڕۆناڵدۆیە.
ڕۆژنامەکە نووسیویەتی، “هەندێک لە یاریزانانی یونایتد لە کریستیانۆ ڕۆناڵدۆ بێزار بوون، یاریزانەکەش هەندێکیانی بێزار کردووە، لە نێو ژووری جلگۆڕینەکان هاوکار و هاوپەیمانی هەیە، بەڵام زۆرینەیان بێزارن لەو بارودۆخەی کە دروستی کردووە.”
کریستیانۆ ڕۆناڵدۆ دوای 12 مانگ لە گەڕانەوەی بۆ مانچستەر یونایتد، ئامادە نییە لە یانەکە بەردەوام بێت و لەگەڵ چەندین یانە دەستی بە دانوستاندن کردووە، ئەو هەنگاوەش دۆخێکی ناجێگیری دروست کردووە.
