پەرلەمانتارێك دەڵێت، دوای چوونی خۆپیشاندەرە سەدرییەكان بۆ ناو ئەنجومەنی نوێنەران، چەندین دۆسیەی گەندەڵی شێوێندراون و ونكراون.
عەلی جەمالی ئەندامی لیژنەی دەستپاكی لە ئەنجومەنی نوێنەرانی عێراق ڕایگەیاند، لیژنەی دەستپاكی بە درێژایی چەندین مانگ ژمارەیەكی زۆری دۆسیەی گەندەڵی كۆكردبووەوە و ئامادەكرابوون بۆ لێكۆڵینەوە.
وتیشی، دوای چوونی خۆپیشاندەرانی لایەنگری ڕەوتی سەدر بۆ ناو باڵەخانەی ئەنجومەنی نوێنەران، چەندین دۆسیەی گەندەڵی شێوێندراون و ونكراون.
ئەو ئەندامەی لیژنەی دەستپاكی لە ئەنجومەنی نوێنەران جەختیكردەوە، “لیژنەكە چەندین مانگی پێویستە بۆ دووبارە كۆكردنەوەی ئەو دۆسیانەی گەندەڵی و جێگیركردنی بەڵگەنامەكانیان” و ڕایگەیاند، لە دەستكاریكردنی دۆسیەكانی گەندەڵیدا پێشێلكاریی كراوە.
