سەرەڕای توندكردنی سیاسەتی پەیوەست بە كۆچبەران و بڕیار لەبارەی ناردنیانەوە بۆ ڕواندا، لەندەن سەركەوتوو نەبووە لە ڕێگریكردن لە پەڕینەوەی كۆچبەران لەڕێی دەریای مانش-ەوە، لە تەنها ڕۆژێكدا نزیكەی 700 كۆچبەر پەڕیونەتەوە، كە ژمارەیەكی پێوانەیی نوێیە لەمساڵدا.
وەزارەتی بەرگریی بەریتانیا ڕایگەیاند، 696 كۆچبەر و خوازیاری مافی مانەوە بە 14 بەلەمی بچوك ڕۆژی دووشەممە گەیشتوونەتە وڵاتەكە، بەرزترین ژمارەیە لەمساڵدا تۆماربكرێت و دووەمجارە لەمساڵدا 600 كەس تێبپەڕێنێت.
بەپێی ڕاپۆرتەكان كۆچبەران بە كۆمەڵ كە لەنێوانیاندا منداڵ هەیە گەیشتوونەتە ڕامسگیت لەسەر كەناری كنت لە باشووری ڕۆژهەڵاتی ئینگلتەرا، بەر لە گواستنەوەیان لەڕێی ئۆتۆمبێلەوە بۆ ناوەندەكانی تۆماری كۆچبەران.
لە سەرەتای ئەمساڵەوە زیاتر لە 18 هەزار كەس خۆیان گەیاندووەتە شانشینی یەكگرتوو لەڕێی دەریای مانش-ەوە، كە بە یەكێك لە ڕێگا قەرەبالغەكانی گواستنەوە لە جیهاندا دادەنرێت.
ساڵی ڕابردوو 28 هەزار و 500 كەس، كە زۆرینەیان گەنج بوون گەیشتنە كەناراوەكانی بەریتانیا، زۆرترین ژمارەیان لە تشرینی دووەمی 2021دا بوو كە گەیشتە 853 كەس.
