دوای ساڵانێك لە دروستكردنی ئۆتۆمبێلی ئاسایی، مەغریب یەكەم ئۆتۆمبێلی كارەبایی دروستكرد و دەڵێت، 100% خۆماڵییە.
ئۆتۆمبێلە كارەباییەكەی مەغریب لە جۆری (پیكاب)ـە، بە وزەی كارەبا كاردەكات و سیستمی لێخوڕینی زیرەك پەیڕەودەكات.
كۆمپانیای نیشتمانیی گواستنەوە و لۆجیستیك كە دروستكردن و بەرهەمهێنانی ئۆتۆمبێل لە مەغریب بەشێكە لە كارەكانی، لەگەڵ لادانی پەردە لەسەر یەكەم ئۆتۆمبێلی كارەبایی كە خۆی دروستیكردووە ڕایگەیاند، دیزاین و دروستكردن و پێكەوەبەستنی پارچەكانی ئۆتۆمبێلەكە بە تەواوەتی و 100% لە مەغریب ئەنجامدراون.
مەغریب ساڵانێكە ئۆتۆمبێل دروستدەكات و بەپێی ڕاپۆرتی ڕێكخراوی نێودەوڵەتیی دروستكەرانی ئۆتۆمبێل، مەغریب ڕیزبەندیی یەكەمی وڵاتانی عەرەبی و دووەمینی ئەفریقا و 28ـەمینی جیهانی لە دروستكردنی ئۆتۆمبێلدا گرتووە، تا ساڵی 2016 زیاتر لە 345 هەزار ئۆتۆمبێل و سوارڕۆی دروستكردووە.
