مەکتەبی ڕێکخستنی یەکێتیی نیشتمانیی کوردستان كادیرانی حزبەكەی ئاگادار دەكاتەوە ئەو ڕاپرسییەی كە بەناوی حزبەكەوە لە سۆشیاڵ میدیا و میدیاكان بڵاوكراوەتەوە ساختەیە و پەیوەندیی بە یەكێتی –یەوە نییە.
لە ڕاگەیەندراوێكدا مەکتەبی ڕێکخستنی یەکێتی ئاماژەی بەوەكردووە، “سەرجەم ھەڤاڵانمان ئاگاداردەکەینەوە کە ڕاپرسییەکی ساختە بەناوی یەکێتیی نیشتمانیی کوردستان لە پلاتفۆرمەکانی سۆشیالمیدیا بڵاوکراوەتەوە کە بەھیچ شێوەیەک پەیوەندی بە یەکێتییەوە نییە”.
جەختیشی كردووەتەوە، “یەکێتیی بۆ هەر چالاکی و ڕاپرسییەک کە مەبەست و یەکێتییانە بێت، ئۆرگانی تایبەتمەندی هەیە ئەو ئەرکە لە ئەستۆ بگرێت و بە ئاشکرا لە کەناڵە فەرمییەکانەوە بانگەشەی بۆ دەکات و هەڤاڵ، ئەندام و لایەنگرانی خۆی ئاگادار دەکاتەوە”.
لە بەشێكی دیكەی ڕاگەیەندراوەكەدا هاتووە، “بۆیە لێرەوە ڕایدەگەیەنین لەو ڕاپرسییە ساختەیە بەرپرسیار نین و ئامانج لێی تەنیا بەلاڕێدابردن و چەواشەکردنی هاوڵاتییان، لێدانە لە سەرکەوتن، نوێبوونەوە و گەشەی یەکێتی”.
بۆیە داوا لە دەزگاکانی ڕاگەیاندن دەکەن لە حاڵەتێکی لەم شێوەیەدا، بۆ وەرگرتنی زانیاری پەیوەندی بە دەزگا فەرمییەکانی یەکێتیی نیشتمانیی کوردستانەوە بکەن تاوەکو هەواڵی هەڵە و چەواشەکارانە بڵاونەکەنەوە.
