وەزارەتی دەرەوەی عێراق ڕایدەگەیەنێت، سكاڵای گەیاندووەتە ئەنجومەنی ئاسایشی نێودەوڵەتی بۆ ئەنجامدانی دانیشتنێكی تایبەت دەربارەی هێرشەكەی دهۆك لەلایەن سوپای توركیاوە كە بووە هۆی كوژرانی 9 كەس.
ئەحمەد سەحاف وتەبێژی وەزارەتەكە ڕایگەیاند، وەزارەتی دەرەوە سكاڵای گەیاندووەتە ئەنجومەنی ئاسایش و داوای كۆبوونەوەیەكی بەپەلەی كردووە بۆ تاوتوێكردنی دوژمنكاریی توركیا، وەك ئەوەی ئاژانسی هەواڵی فەرمیی عێراق بڵاویكردووەتەوە.
چوارشەممەی ڕابردوو بەهۆی بۆردومانێكی توركیاوە بۆسەر هاوینەهەوارێك لە زاخۆ 9 هاوڵاتیی مەدەنی كوژران و 23ی دیكە برینداربوون.
پێشتریش وەزارەتی دەرەوەی عیراق عەلی ڕەزا كۆنای، باڵیۆزی توركیای بانگێشتكرد و یاداشتی ناڕەزایەتیی توندی ڕادەستكرد، بەغداد داوایشی لە ئەنقەرە كرد سەرجەم هێزەكانی لە خاكی عێراقدا بكشێنێتەوە.
هەروەها حكومەتی عێراق ڕایگەیاند، ئەنجامدەری كارەكانی لە ئەنقەرە بانگێشتدەكاتەوە بەمەبەستی “وتووێژ و ڕاگۆڕینەوە”، پاش كۆبوونەوەیەكی بەپەلەی ئەنجومەنی ئاسایشی نیشتیمانی.
