لێپرسراوی زەڕەنگەرەكانی سلێمانی هۆكاری دابەزینی نرخی زێر لە بازاڕەكاندا ئاشكرادەكات و جەختیشدەكاتەوە پێشبینیدەكرێت لە مانگی ئەیلولدا نرخی زێر بەرزبوونەوە بەخۆوە ببینێت.
دلێر تاهیر لێپرسراوی زەڕەنگەرەكانی سلێمانی لە لێدوانێكدا بە تۆڕی میدیایی ئێستای ڕاگەیاند، ئەمریكا سوودی زیاتری خستووەتە سەر بەهای زێر و ئەوەش بووەتە هۆی ئەوەی نرخی زێر لە بازاڕەكانی جیهان و هەرێمی كوردستاندا ناجێگیر بێت و زیاتر ڕوو لە دابەزین بكات و لە ماوەی یەك مانگدا زێری عەیارە 21 بە نموونە وەربگرین یەك مسقاڵی 40 دۆلاری لەدەستداوە.
ئاشكرایكرد، ماوەی چەند ڕۆژێكە زێر گۆڕانكاری لە نرخەكەیدا ڕوودەدات و جێگیر نییە و زیاتر نرخەكەی ڕووی لە دابەزین كردووە.
ئاماژەی بەوەشكرد، یەك مسقاڵی زێری عەیارە 21 لە بازاڕەكاندا بە 240 دۆلار مامەڵەی پێوەدەكرێت و یەك مسقاڵ زێری عەیارە 18 بە 207 دۆلار و زێری عەیارە 24 زیاتر بە كیلۆیە و یەك كیلۆی بە نزیكەی 15هەزار دۆلارە.
دلێر تاهیر پێیوایە نرخی زێر لە مانگی ئەیلولی ئەمساڵدا ڕوو لە بەرزبوونەوە دەكات كە ئەوەش پەیوەندیی بە پەیڕەوكردنی سیاسەتەكانی ئەمریكاوە هەیە.
