هەسەدە دەستگیركردنی شانەیەكی سیخوڕیان لە چەند ناوچەیەكی حەسەكە ڕاگەیاند.
ناوەندی هێزەكانی سوریای دیموكرات – هەسەدە لە ڕاگەیەندراوێكدا ئاماژەی بەوەكردووە، دوێنی لە ئۆپەراسیۆنێكدا لە شارۆچکەی تل براک کە 42 کیلۆمەتر لەشاری حەسەکەی ڕۆژئاوای کوردستانەوە دوورە، شانەیەکی سیخوڕییان دەستگیرکردووە کە لەبەرژەوەندیی دەزگای هەواڵگریی تورکیا کاریانکردووە.
ڕوونیشیكردووەتەوە، شانەكە لە سێ کەس پێکهاتوون، لەخانوویەکدا کۆببوونهوه و یەکێک لەئەندامەکان ئامادەنەبووە خۆی بدات بەدەستەوە و هەوڵیداوە بەرەنگاری هێزە ئەمنییەکان ببێتەوە، لەئەنجامیشدا کوژراوە و هاوکارەکانیشی دەستگیرکراون.
ئەوەش دوای ئەوەدێت، لە مانگی ڕابردووەوە هێزەکانی سوریای دیموکرات ئۆپەراسیۆنی (سوێند)یان بۆ دەستگیركردنی “سیخوڕو بەکرێگیراوانی”ی تۆڕەهەواڵگرییەکانی تورکیا دەستپێکردووە.
