بەڕێوبەرایەتیی پۆلیسی ڕواندز، ئەمڕۆ 27ی تشرینی دووەم ئاشکرایکرد کە تەرمی مامۆستایەک لە نزیک ماڵەکەی خۆی دۆزرایەوە و بەپێی وتەی پۆلیس ڕوداوەکە خۆکوژی بووە.
لە ڕاگەیەنراوێکدا بەڕێوبەرایەتیی پۆلیسی ڕواندز ڕایگەیاند، “نیوەڕۆی ئەمڕۆ کاتژمێر 12:15ی ئاگادار کراینەوە لەوەی هاوڵاتییەک، کە پیشەی مامۆستاییە تەرمەکەی لە ژورێکی کێڵگەیەکی پەلەوەر لە نزیک ماڵەکەی خۆیدا دۆزرایەوە”.
سەبارەت بە ناسنامەی هاوڵاتییەکە پۆلیسی ڕواندز ئاشکرایکرد، ئەو هاوڵاتییە ناوی (ح.س.م) بووە و پیشەی مامۆستا بووە و لەدایکبووی 1986 بووە.
بەپێی ڕاگەیەنراوەکەی پۆلیس لەگەڵ تەرمی مامۆستاکەدا چەکێکی کڵاشینکۆف دۆزراوەتەوە و گومان دەکرێت کە ڕوداوەکە خۆکوژی بووە.
پۆلیسی ڕواندز ئاشکراشیکرد، ئێستا لێکۆڵینەوەکان لە ڕووداوەکە دەستیپێکردووە و بەردەوام دەبێت.
