وەزیری ئاوەدانكردنەوە و نیشتەجێكردنی هەرێم رایدەگەیەنێت، نۆ هەزار یەكەی نیشتەجێبوون بەسەر هاوڵاتییاندا دابەشدەكرێت و دەشڵێت،” ناوەكان لە وەزارەتەوە ئاراستەی پارێزگا و ئیدارە سەربەخۆكان كراوە دوای وردبینیكردن لە ناوەكان گرێبەستیان بۆ دەكرێت بۆ پێدانی یەكەكانی نیشتەجێبوون”.
دانا عەبدولكەریم، وەزیری ئاوەدانكردنەوە و نیشتەجێكردنی هەرێم لە لێدوانێكیدا رایگەیاند، لەسەر تاسەری هەرێمی كوردستان نۆ هەزار یەكەی نیشتەجێبوون هەن كە بەشێكیان تەواوكراون و ئەوانەشی تەواونەبوون دابەشدەکرێت، بۆ ئەوەی هاوڵاتی بزانێت ئەو یەكە نیشتەجێبوونەی پێدراوەو بۆ ئەو مەبەستەش دەستكراوە بە رێكارەكان بۆ پێدانی ئەو یەكە نیشتەجێبووانە بەسەر هاوڵاتییانی كەمدەرامەتدا.
راشیگەیاند، ناوەكان نێردراون بۆ پارێزگا و ئیدارە سەربەخۆكان تاوەكو وردبینی بكرێت و لیژنەیان لەسەر ئاستی پارێزگا و ئیدارە سەربەخۆكان بۆ پێكدەهێندرێت ئەگەر گرفتیان نەبوو و زانیارییەكانیان دروستبوو بە نووسراوێك وەزارەت ئاگاداردەكرێتەوە و گرێبەستیان بۆ دەكرێت یەكەكانیان پێدەدرێت.
