کچێکی بەرازیلی کە تەمەنی 29 ساڵە، بڕێکی زۆر پارەی خەرجکردووە تاوەکو خەونەکەی بەدیبهێنێت، ئەویش هاوشێوەبوونیەتی لەگەڵ کیم کارداشیانی ئەستێرەی ئەمریکی بەجۆرێک دەقاودەق لە ئەو بچێت.
ڕۆژنامەی نیویۆرک پۆستی ئەمریکی بڵاویکردووەتەوە، جێنیفەر پامپلۆنا ئەو کچە بەرازیلییەی ویستوویەتی خۆی وەک کیم کارداشیان لیبکات، بڕی 600 هەزار دۆلاری لە نەشتەرگەرییەکانی جوانکاریدا خەرجکردووە بۆئەوەی دەقاودەق وەکو کارداشیان بێت.
سەرەڕای تێچووە مادییەکەی جێنیفەر 12 ساڵی تەمەنیشی بۆ بەدیهێنانی ئەو خەونە تەرخانکردووە، یەک بەدوای یەکدا نەشتەرگەرییەکانی ئەنجامداوە تاوەکو ژمارەیان گەیشتووەتە 40 نەشتەرگەری، ئەمە سەرەڕای ئەو کارانەی بە بەکارهێنانی فیلەر بۆیکراوە.
لە ئەنجامدا جێنیفەر وەک کارداشیان دەرکەوت، بەجۆرێک پێیدەوترا کیم کارداشیانی2.
لەسەرەتا ئەو گۆرانکارییانە جێنیفەریان دڵخۆشکرد، کە بەو ڕووخسارە نوێیەوە دەردەکەوت، بەڵام بە تێپەڕبوونی کات ئەوە بێزاری دەکرد کە وەک کەسێکی دیکە دەرەدەکەوێت، بەتایبەت کاتێک خەڵکێکی زۆر بە ناوی خۆی بانگیان نەدەکرد و پێیاندەوت کارداشیان.
جێنیفەر دەڵێت، جوانکارییەکان دڵخۆشییەکی درێژخایەنیان پێنەدام، ئێستا هیواخوازە کە ئەو نەشتەرگەرییانەی ئەنجامنەدایە.
بۆیە جێنیفەر جارێکی دیکە هەوڵی گەڕاندنەوەی ڕووخسارە کۆنەکەی خۆی دەدات و بۆ ئەو مەبەستەش بڕی 118 هەزار دۆلاری خەرجکردووە تاوەکو بگاتەوە بە هەمان ڕووخساری پێشووی خۆی.
