حاجی مەسیفی ئەندامی سەرکردایەتیی یەکێتیی نیشتمانیی کوردستان سەبارەت بە تەقەکردن لە ماڵەکەی ئاشکرایکرد، دژایەتیی لەگەڵ هیچ کەسێک نییە و “ئەو تەحەدایانەش جێگەی قبوڵکردن نین”.
لە کۆنگرەیەکی ڕۆژنامەوانیدا حاجی مەسیفی ڕایگەیاند، ڕووداوەکە لە کاتژمێر 2:05 خوڵەکی بەرەبەیانیی ئەمڕۆ ڕوویداوە، تەقە لە ژووری نوستنەکەی و ژووری پاسەوانەکانی کراوە.
وتیشی، “تەقەکردن لە ماڵی ئەندامێکی سەرکردایەتیی یەکێتیی نیشتمانیی کوردستان تەحەدایەکی گەورەیە و مانای گەورەی هەیە”.
داوایکرد، لێکۆڵینەوە و بەدواداچوونی ورد لەوبارەیەوە بکرێت، چونکە “تەقەکردن لە من و ماڵەکەم و تەحەداکردن بەوجۆرە جێگەی قبوڵکردن نییە، چاوەڕێی ئەنجامەکانی ئاسایش و دادگا دەبین تاوەکو ئەو بابەتە دیزە بە دەرخۆنە نەکرێت”.
حاجی مەسیفی دەڵێت، “نامەوێت وەڵامی توند بدەمەوە، بەڵام ئەگەر ئەنجامەکان بەجۆرێکبن ناچاردەبم وەڵام و قسەی دیکەم هەبێت، حکومەتێک نەتوانێت ئارامی و ئاسایش لە پەیتەختەکەیدا دابینبکات کاری چییە”.
ئاماژەی بەوەکرد، “بۆ هەموو لایەکمان ناخۆشە خەڵک لە پایتەختدا شەو ئارام نەبێت، ڕۆژ ئارام نەبێت، دەوڵەمەند لە سەرمایەکی بترسێت، خوێندکار و مامۆستا لەخۆیان بترسن، ئێمە کە حزبیین لەخۆمان بترسین، بەڕاستی ئەمە حکومەتی جەنجاڵییە”.
