وەزارەتی دەرەوەی سوید ڕایگەیاند، لە ئەنجامی ئەو ڕاپۆرتانەی لە کونسوڵخانەی سوید لە ئێران و تورکیا وەرگیراوە، داوا لە دانیشتووانی سوید دەکەن سەردانی باکووری کوردستان و سنوورەکانی ئێران و عێراق نەکەن.
وەزارەتی دەرەوەی سوید لە ڕاگەیەندراوێکدا ڕایگەیاندووە، “داوا لە دانیشتووانی وڵات دەکەین، خۆیان دووربگرن لە سنوورەکانی سوریا و تورکیا و ئێران، بەتایبەت 10 کیلۆمەتر دووربن لە سنوورەکانی عێراق و هەندێک لە سنوورەکانی ئێران”.
ئاماژە بەوەشکراوە، “بەگشتی سەردانیکردنی باکووری کوردستان باش نییە، جگە لەچەند شارێکی گەورەی وەک دیاربەکر”.
وەزارەتی دەرەوەی سوید ڕاشیگەیاندووە، “ئەو ئاگادارکردنەوانە بەمانەی قەدەغەکردنی گەشت نییە، بەڵکو ئەگەر سویدییەک سەردانی ئەو شوێنانە بکات و تووشی کێشەیەک ببێت، ئەوا هاوکاریکردنیان قورس دەبێت و ناتوانرێت هاوکاریی تەواویان پێبگەیەندرێت”.
ڕاپۆرتەکانی ئەو کونسوڵخانانەی سوید لەسەر بنەمای ئەو ئاڵۆزییانەن ئەم ماوەیە لەو ناوچانە ڕوویانداوە، بەتایبەت هەڕەشەی سوپای پاسداران لە حزبەکانی ڕۆژهەڵات و ئەگەری دروستبوونی گرژی لە سنوورەکانی سیستان و بلوچستان، جگە لە هێرشە بەردەوامەكانی توركیا بۆسەر هەرێمی كوردستان.
