فیدراسیۆنی تۆپی پێی جیهان (فیفا) پێشنیازی کردووە، بۆ مۆندیالی 2022ی قەتەر کامێرا لە ژووری جلگۆڕینی سەرجەم تیمە بەشدارەکان جێگیر بکرێت.
بەپێی زانیارییەکانی (ڕادیۆ مۆنتی کارلۆ- RMC sport)، لێپرسراوانی فیفا بیریان لەوە کردووەتەوە بە جێگیرکردنی کامێرا لە ژووری جلگۆڕینی یاریزانان، لە مۆندیالی 2022 چێژێکی جیاواز بە هاندەران بدەن.
بەو جۆرە بەر لە دەستپێکی یاری و لە نێوان تایمەکاندا هاندەران دەتوانن چێژ لە کاردانەوە و گفتوگۆی نێوان یاریزانان، هەروەها چۆنیەتی داڕشتنی تەکتیکی ڕاهێنەران وەربگرن.
“مۆنتی کارلۆ” ئاشکرای کردووە، هەرچەندە پێشنیازەکە کراوە و زۆرینەی لێپرسراوانی فیفا بەلایانەوە پەسەندە، بەڵام بەهۆی بەرهەڵستی یاریزانان و ڕاهێنەران و ستافی هونەریی هەڵبژاردەکانەوە، قورسە لە مانگی تشرینی دووەم و بەتایبەت لە مۆندیال ڕێگە بە جێبەجێکردنی بدرێت، چونکە ئەوان نایانەوێت هاندەران کاردانەوە توندەکانیان، یاخود پلانەکانیان بە ئاشکرا ببینن و ببیستن.
