بەپێی ئەو پێوەرە جیهانییانەی کە بۆ تیرۆر بڵاوکراوەتەوە دەریدەخات، لە ساڵی 2020دا ژمارەی گیانلەدەستدان بەهۆی تیرۆرەوە کەمیکردووە، بەجۆرێک نزمترین ئاستی لەماوەی پێنج ساڵی ڕابردوودا تۆمارکردووە.
پەیمانگای ئابوری و ئاشتی، پێوەرە جیهانییەکانی بۆ تیرۆر بڵاوکردەوە و ئاشکرایکردووە، ناوچەکانی جەنگ لە ساڵی 2019دا %96ی قوربانیانی تیرۆریان تێدابووە و وەکو ناوچەی چڕی تیرۆریش دەمێننەوە.
پەیمانگای ئابوری و ئاشتی کە بارەگاکەی لە سیدنییە لە لێکۆڵینەوەکەیدا کە لە ئاژانسی فرانس پرێس بڵاویکردووەتەوە جەختدەکاتەوە لەوەی، ژمارەی گیانلەدەستدان بەهۆی تیرۆرەوە بەراورد بە ساڵی 2019 کەمیکردووە بە ڕێژەی %15 و بەراورد بە پێنج ساڵی ڕابردوو لە دوای 2014ەوە بەڕێژەی %59 کەمیکردووە.
پێوەرەکان ئاماژەیان بە دە وڵات کردووە کە زۆرترین کاریگەری تیرۆریان لەسەرە و ئەو وڵاتانەش بەپێی ڕیزبەندییەکە بریتیین لە، ئەفغانستان، عێراق، نەیجیریا، سوریا، سۆماڵ، یەمەن، پاکستان، هیندستان، کۆماری کۆنگۆی دیموکرات و فلیپین.
پێوەرەکان ئاشکرایانکردووە کە بزوتنەوەی تاڵیبان ئەو گروپەیە کە هۆکاری زۆرترین مردن بووە بە تیرۆر لە ساڵی 2019دا، لەگەڵئەوەشدا ڕێژەی %18ی هێزەکەی لەدەستداوە، بەڵام داعش لە ساڵی 2019دا ژمارەی ئەندامان و لایەنگران و هێزەکەی بەڕێژەیەکی زۆر لەدەستدا لەدوای ڕوخانی ‘خەلافەتەکەی’.
ڕوونیشیکردووەتەوە داعش لەسەرەتای دەستپێکردنی چالاکییەکانییەوە بەرپرسیاربووە لە مردنی لانیکەم هەزار کەس لە ساڵێکدا.
هەروەها ئاماژەی بەوەشکردووە ئەو ناوچانەی گروپەکانی سەربە داعش و ئەلقاعیدەیان تێدا زیاتر لە هەر ناوچەیەکی دیکە ڕوبەڕووی تیرۆر دەبنەوە.
