وه‌زاره‌تى ناوخۆی حكومەتی هەرێمی كوردستان، بڕیاریدا بەشێك لەو ئۆتۆمبێلانەی هێنراونەتە هەرێمی كوردستان و بەهۆی بوونی گرفتەوە تۆمارنەكراون، تۆماربكرێن و ژمارەیان پێبدرێت.
ئەمڕۆ دووشەممە وەزارەتی ناوخۆ ڕاگەیەندراوێكی بڵاوكردەوە و دەڵێت، “له‌به‌ر به‌رژه‌وه‌ندیی گشتی و بەپێی ئەو دەسەڵاتەی پێماندراوە، بڕیارماندا ئه‌و ئۆتۆمبێلانەی كه كێشه‌یان هه‌یه و هاتوونه‌ته ناو هه‌رێمى كوردستان و بڕوانامه‌ى “COC”یان پێدراوه تۆماربكرێن”.
مەرجی وەزارەتی ناوخۆ بۆ تۆماركردنی ئۆتۆمبێلەكان، ئەوەیە كە تەنها كێشەی بچووكیان هەبێت و نابێت بڕاوە، لافاو و سووتاو بن.
لە درێژەی بڕیارەكانیدا وەزارەتی ناوخۆ ئاشكرایكردووە، مەرجە ئەو ئۆتۆمبێلەی تۆماردەكرێت تا كاتژمێر 3ی دوای نیوەڕۆی ڕۆژی 3/7/2022 هێنرابێتە هەرێمی كوردستانەوە، بە پێچەوانەوە بڕیارەكان نایگرێتەوە و تۆمارناكرێت.
