ئەنجومەنی هەرێمی بۆ كاروباری نەوت و گاز یەكەم كۆبوونەوەی خۆی دوای هەمواركردنەوەی یاسای نەوت و گاز ئەنجامدا و جەختكرایەوە كە حكومەتی فیدڕاڵ لە شەش مانگی ئەمساڵدا تەنها 400 ملیار دیناری بۆ هەرێمی كوردستان ناردووە، بەڵام حكومەتی هەرێم مووچەی هەر شەش مانگەكەی دابەشكردووە و شاندی دانوستانكاریی هەرێمیش ئامادەیە سەردانی بەغداد بكات بۆ چارەسەركردنی كێشەكان.
بەپێی ڕاگەیەندراوێكی فەرمانگەی میدیا و زانیاری حكومەتی هەرێم تێیدا هاتووە، ئەمڕۆ پێنجشەممە كۆبوونەوەی ئەنجومەنی هەرێمی بۆ كاروباری نەوت و گاز بەرێوەچووە.
لە ڕاگەیەندراوەكەدا هاتووە، بڕگەیەكی یەكەمی كۆبوونەوەكە تایبەت بووە بە داهاتی گشتی بەدەستهاتوو لە هەناردەكردن و فرۆشتنی نەوت كە بریتییە لە كۆی گشتی نەوتی بەرهەمهێندراو و بەكارهێندراوی ناوخۆیی و تێكڕای نرخی یەك بەرمیل نەوتی فرۆشراو لەو ماوەیەدا.
ئاماژە بەوەشكراوە، چۆنیەتی خەرجكردنی داهاتی بەدەستهاتوو لەو ماوەیەدا خرایەڕوو كە بۆ دابینكردنی مووچەی شەش مانگی یەكەمی ئەمساڵ خەرجكراوە، حكومەتی هەرێم لە داهاتی نەوت پارەی پێویستی بۆ دابینكردنی مووچەی تەواوی شەش مانگی ساڵ دابینكردووە لە كاتێكدا حكومەت فیدراڵ دەبوو ترلیۆنێك و دووسەد ملیار بنێرێت، بەڵام تەنها 400 ملیار دیناری ناردووە لە داهاتەكانی نەوت و ناوخۆی هەرێم هەموو مانگێك مووچە دابەشكراوە.
بڕگەی دووەمی كۆبوونەوەكە ، تایبەت بووە بە خستنەڕووی دوایین كێشەكانی نێوان حكومەتی هەرێم و حكومەتی فیدراڵ تایبەت بە بە دۆسیەی نەوت وگاز و جەخت لە چارەسەركردنی كێشەكان لە سەر بنەمای دەستوور كرایەوە و شاندی دانوستانكاریی هەرێمیش ئامادەیە سەردانی بەغداد بكات بۆ گفتۆگۆكردن لە‌سە‌ر كێشەكان.
