بافڵ جەلال تاڵەبانی ڕایدەگەیەنێت، پاڵپشت و پشتیوانی هەموو ئەو گەنجانە دەکەم کە بیرۆکەی داهێنەرانەیان هەیە و دەیانەوێت خزمەت بە کوردستان بکەن و دەرگامان بۆ هەموو هەوڵێکی لەو شێوەیەش کراوەیە.
بافڵ جەلال تاڵەبانی لە دەباشان پێشوازیکرد لە بۆکان جاف، یەکێک لەو گەنجانەی ڕۆڵێکی گرنگ و بەرچاوی هەبوو لە زیادکردنی کوردیی سۆرانی بۆ بەشی وەرگێڕانی گووگڵ.
لە دیدارەکەدا بافڵ جەلال تاڵەبانی ستایشی ڕۆڵ و ماندووبوونی بۆکان جاف و هەموو ئەو گەنجانەی کرد کە هەوڵێکی گرنگ و نموونەییان داوە بۆ زیادکردنی كوردیی سۆرانی لە بەشی وەرگێڕانی گووگڵ و وتی، یەکێتیی نیشتمانیی کوردستان پێشوازی و پشتگیری لە هەموو هەوڵێکی لەو شێوەیە دەکات لە بواری تەکنەلۆجیا و دەبێت هەموومان پێکەوە پشتگیری ئەو گەنجە زیرەک و داهێنەرانە بکەین و کارئاسانیان بۆ بکەین.
باسی لەوەشكرد، گەنجان سەرمایەی نیشتمانیی ئێمەن و بونیادنانی داهاتوویەکی گەشتر و ئارامتر بەندە بە پاڵپشتی و هاریکاری گەنجە خوێنگەرم و چالاکەکانمانەوە.
لە درێژەی دیدارەکەدا بافڵ جەلال تاڵەبانی ڕایگەیاند، “پاڵپشت و پشتیوانی هەموو ئەو گەنجانە دەکەم کە بیرۆکەی داهێنەرانەیان هەیە و دەیانەوێت خزمەت بە کوردستان بکەن، خزمەتکردنی گەنجە دڵسۆزەکانی نیشتمان بە ئەرکی خۆمان دەزانین و دەرگامان بۆ هەموو هەوڵێکی لەو شێوەیە کراوەیە و بە ڕێز و پێزانینەوە لە پێشوازیاندا دەبین”.
