پێشنوێژ و وتارخوێنی پێشووی مزگەوتی گەورەی فەلوجە، فەتوای حەرامبوونی خواردنەوەی پیپسیی دا، بەڵام دواتر ڕەتیكردەوە.
شێخ جەمال شاكر نەزال، پێشنوێژ و وتارخوێنی پێشووی مزگەوتی گەورەی فەلوجە ڕایگەیاند، خواردنەوەی پیپسی حەرامە.
لە گرتەیەكی ڤیدیۆییدا كە بەكارهێنەرانی تۆڕە كۆمەڵایەتییەكان لە عێراق بڵاویانكردەوە، شێخ جەمال شاكر نەزال، پێشنوێژ و وتارخوێنی پێشووی مزگەوتی گەورەی فەلوجە دەڵێت، “خواردنەوەی پیپسی حەرامە”.
دوای بڵاوبوونەوەی ڤیدیۆكە و ئەو كاردانەوانەی بەدوای خۆیدا هێناونی، شێخ جەمال شاكر لە گرتەیەكی ڤیدیۆییدا ڕوونكردنەوەی دا و وتی، “ناتوانم شتێك حەرامبكەم كە نازانم پێكهاتەكانی چین، زۆرینەی خەڵكیش دەزانن وازم لە پێشنوێژی و وتارخوێنی هێناوە و ماوەی 10 ساڵە زۆر بە دەگمەن ئەو كارانە دەكەم”.
