بەڕێوەبەرایەتیی بەرەنگاربوونەوەی توندوتیژیی دژی ژنان و خێزان ڕایگەیاند، تۆمەتبارێک بە تۆمەتى فریودانى کچان دەستگیركراوە.
بەڕێوەبەرایەتیی بەرەنگاربوونەوەی توندوتیژیی دژی ژنان و خێزان لە ڕاگەیەندراوێکدا بڵاویکردەوە، ئەمڕۆ پێنجشەممە نووسینگەی سەیدسادقی سەر بە بەڕێوەبەرایەتییەكە بە هاوکاریی نووسینگەی منارەی سەر بە بەڕێوەبەرایەتیی بەرەنگاربوونەوەی توندوتیژیی دژی ژنان و خێزان لە هەولێر، کەسێکیان بە ناوی (م . ل) تەمەن (30) ساڵ دەستگیركردووە.
بەپێی ڕاگەیەندراوەكە، دەستگیركراوەكە لەلایەن کچێکەوە لە سەیدسادق سکاڵا لە دژی تۆماركراوە و دەڵێت، لەبەر ئەوەی دەوڵەمەندە، چەندین کچی لە ڕێگەی تۆڕە کۆمەڵایەتییەکانەوە فریوداوە و دواتر “هەڕەشەی بڵاوکردنەوەی وێنە و ڤیدیۆی لێکردوون”.
وەك ڕاگەیەندراوەكە ئاشكرایكردووە، تۆمەتبارەكە بە فەرمانی دادوەر بەپێی ماددەی 2ی خراپ بەکارهێنانی ئامێرەکانی پەیوەندیکردن دەستگیرکراوە و لە ئێستادا ژیانی کچەکە پارێزراوە.
