كورتی یان درێژیی باڵای مرۆڤ، پەیوەندی هەیە بە تووشبوونی بە چەند جۆرێكی نەخۆشی، لەوانە نەخۆشییەكانی دڵ و دەمار و دەوالی.
توێژەرانی زانكۆی كۆلۆرادۆ لە ئەمریكا، توێژینەوەیەكیان لەبارەی پەیوەندیی نێوان درێژی و كورتیی باڵا و تووشبوون بە نەخۆشییەكان كردووە. سەرپەرشتیارانی توێژینەوەكە، زانیارییە تەندروستییەكانی زیاتر لە 250 هەزار كەسیان وەرگرتووە و شیكارییان بۆ زیاتر لە هەزار جۆری نەخۆشی كردووە.
سریدهاران ڕاجافان كە سەرپەرشتیی تیمی توێژەرانی كردووە دەڵێت، باڵابەرزەكان زیاتر تووشی دەوالی دەبن، بەڵام كەمتر دووچاری بەرزبوونەوەی پەستانی خوێن و بەرزبوونەوەی ڕێژەی كۆلیسترۆڵی خوێن دەبن.
ئەنجامی توێژینەوە پزیشكییەكە ئاشكرایكردووە، باڵابەرزەكان زیاتر تووشی تێكچوونی دەماری دەست و قاچەكان و هەوكردنی پێست و ئێسك دەبن.
لە ساڵی 2017دا زانایانی سوید گەیشتبوون بەو ئەنجامەی كە باڵابەرزەكان زیاتر تووشی جەڵتەی خوێن و شێرپەنجە دەبن، بەڵام كەسانی باڵا كورت ئەگەری تووشبوونیان بە نەخۆشیی جۆری دووەمی شەكرە زیاترە بەراورد بە كەسانی باڵابەرز.
