قائیمقامیەتی قەزای دوکان لە ڕوونکردنەوەیەکدا باس لە خراپی کوالێتیی ئەو بەنزینە دەکات کە چووەتە قەزاکە و دڵنیایی دەدات کە لێپێچینەوە لە هەر کەس و لایەنێک دەکەن هۆکار بووبێت.
لە ڕوونکردنەوەکەی قائیمقامیەتی دوکاندا هاتووە، “ئەمڕۆ چەند لاپەڕەیەکی فەیسبوک و ژمارەیەک شۆفێر نیگەرانییان پێڕاگەیاندین لەبارەی خراپی ئەو بەشە بەنزینەی لە سنووری دوکان دابەشکراوە، لیژنەی سوتەمەنیی قائیمقامیەت نمونەیان لە بەنزینەکە وەرگرتووە بۆ پشکنین”.
قائیمقامیەتی دوکان ئاشکرایکردووە، هەر بۆ ئەو مەبەستە بەڕێوەبەرایەتیی نەوت و کانزاکانی سلێمانییان ئاگادارکردووەتەوە لە خراپی کوالێتیی ئەو بەشە بەنزینە و لێکۆڵینەوەیان دەست پێکردووە.
بەپێی ڕوونکردنەوەکە دەرکەوتووە، ئەو بەشە بەنزینەی چووەتە سنووری دوکان کوالێتیی باش نەبووە، قائیمقامیەتی دوکان دڵنیایش دەداتە شۆفێران لێپێچینەوە لەو کەس و لایەنە دەکرێت کە بوونەتە هۆکاری خراپی کوالێتیی ئەو بەشە بەنزینە و جارێکی تر حاڵەتێکی لەم جۆرە دوبارە نابێتەوە.
